Категорија: Настани

 09. 04. 2017 – 14. 04. 2017

---

Од 9 до14 Април 2017 година во нашата земја престојува реактивна мониторинг мисија на УНЕСКО/ИКОМОС/ИУЦН за да изврши увид во спроведените активности на терен и да оцени колку се почитуваат нивните препораки за обемот на градежните зафати и нивното влијание врз животната средина и културното наследство на светското добро “Природното и културното наследство на Охридскиот регион”.

Мисијата во состав: г-ѓа Ана Сидоренко, претставник од Центарот за светско наследство на УНЕСКО, г-ѓа Маја Васиљевиќ од ИУЦН (Меѓународна унија за конзервација на природата, советодавно тело на УНЕСКО) и г-дин Пјер-Мари Трико, претставник од ИКОМОС (Меѓународен совет за споменици и места, советодавно тело на УНЕСКО), денес имаше работна средба во НУ Завод за заштита на спомениците на културата и Музеј-Охрид. Според г-ѓа Сидоренко средбата беше со цел да се добијат информации и да се видат напорите, проектите и напредокот во нивната имплементација од страна на централната, но и локалната власт, во заштитата на културното наследство и спроведувањето на забелешките од УНЕСКО од минатата година на 40-тата седница одржана во Истанбул. По извршениот мониторинг од страна на мисијата, како и по состаноците и консултациите што следуваат, ќе бидат презентирани нивните натамошни насоки и препораки.

По работниот состанок, експертите од УНЕСКО ги посетија локалитетот Плаошник, црквите “Св. Богодорица Перивлепта” и “Св. Софија”, Галеријата на икони, Античкиот театар, локалитетот “Манчевци” и повеќе објекти на кои се преземени конзерваторски активности.

Од 9 до14 Април 2017 година во нашата земја престојува реактивна мониторинг мисија на УНЕСКО/ИКОМОС/ИУЦН

04. 04. 2017 – 05. 04. 2017

---

Форумот на Словенските Култури (ФСК) е непрофитна организација основана во 2004 Година во Љубљана. На иницијатива на експертскиот тим на земјите членки на Форумот (Белорусија, Бугарија, Босна и Херцеговина, Црна Гора, Чешка Република, Хрватска, Македонија, Полска, Русија, Словенија, Словачка и Србија) во 2012 година е востановена наградата “Жива”, а натпреварувањето е во шест категории.

Со своето учество, земјите членки на ФСК ги промовираат исклучителните достигнувања на полето на културните вредности истакнувајќи го при тоа значајното културно наследство на словенските земји. Самата награда е наречена “Жива”, според словенската божица на плодноста, чиј главен атрибут е житото, па и изгледот на оваа посебна награда е инспириран токму од класовите жито.

Оваа година доделувањето на наградите ќе се одржи на Блед во Словенији, од 20 до 24 септември, а нашата институција е единствен номиниран кандидат од нашата земја помеѓу повеќе од 20 музеи од 13 земји.

Деновиве (4-5 април), во Охрид престојуваа судиите Билјана Брајовиќ од Црна Гора и Катја Џумалиева од Бугарија за да извршат увид и оцена на капацитетите, вредностите, значењето, богатството и разновидноста на нашите музејски збирки и воопшто севкупното работење на НУ Завод и Музеј-Охрид на полето на чувањето, документацијата, заштитата и конзервацијата и, секако, презентацијата на огромниот фонд културно наследство што ни е доверено на чување за идните поколенија. Фотографиите се од денешната посета на Музејот на вода во Заливот на коските, единствен од овој вид на Балканот и воопшто во поширокиот регион. Според реакциите и нескриеното воодушевување на судиите навистина сме сериозен кандидат за добивање на некоја од наградите, држете ни палци.

Престој на судиите Билјана Брајовиќ од Црна Гора и Катја Џумалиева од Бугарија

02. 06. 2017 – 15. 06. 2017

---

На изложбата “Мал формат” се преставени дела изработени во најразлични ликовни техники од 50 македонски автори, членови на друштвото на ликовни уметници на Македонија (ДЛУМ). Инаку, малиот формат од секогаш претставувал творечки предизвик и искушение дури и за најголемите уметници како Пикасо, Дали, Матис, Лотрек, Ван Гог, Гоген, сликари од сите школи и правци кои го чувствувале внатрешниот порив да го совладаат малиот квадрат, со димензии 25 х 25см, и на концизен, а понекогаш и метафоричен начин да го пренесат мотивот од големото платно во смалена димензија. Изложбата која е отворена на 2 јуни ќе трае до 15 јуни.

Во петок на 02. 06. 2017 во 19:00 часот, во галеријата Робевци се отвори изложбата МАЛ ФОРМАТ на друштвото на ликовни уметници на Македонија.

14. 10. 2016

---

Богатата збирка na плакати која Полската амбасада во РМ ја донесе, во земјава е достапна и за охридската уметничка публика на изложбата во спомен куќата на Христо Узунов. Изложени се дела на најистакнатите полски автори на плакатот од таканаречените Златни години, од 1950 година до денес. Со децении, ниту еден јавен настан, филм, фестивал, концерт,театарска престава не е презентиран без присуство на плакат. Со инвенцијата на тробојната литографски процес во 1880 година од страна на францускиот графичар Џулс Шерет плакатот на крајот од 19 век во Европа станува уметност на големиот урбан пејзаж. Ова ново средство на комуникација особено се развива со новите графички решенија и големата иновативност на првите мајстори на постерот, Анри де Тулуз Лотрек, Леонето Капиело, Алфонс Муха, Еуген Грасет.

Полскиот плакат е дозволена форма на уметничка екпресија, а благодарение на Полските графичари Полска станува светски позната по уметноста на плакатот. Полскиот плакат достигнува ниво на национална уметност благодарение на екстремно талентираните графичари како Томашевски.Леница, Мајевски, Млодожењец, Старовјејски, Швјежи и многу други.

Во Варшава во 1968 година се отвори првиот музеј на плакат во светот, Музејот на плакатот во Виланов како дел од Националниот Музеј во Варшава чија колекција брои повеќе од 60.000 дела и воедно е една од најголемите колекции на плакат во светот. Инаку оваа изложба е реализирана преку проектот “Музеум линк” на Музеј на град Скопје во соработка со 18 музеи надвор од Скопје, меѓу кои и НУ Завод и Нузеј-Охрид.

Полската школа за плакат, не е само врв на полската креативност и културно живеење по Втората светска војна, туку и сериозен претставник во европските културни текови. Изложбата е презентирана во галерии и музеи во повеќе градови низ Македонија.

Изложба на Полската школа на плакати во Спомен куќата на Христо Узунов

09. 09. 2016 – 16. 09. 2016

---

Мустафа Џеват Атал е роден во Караман Турција. Дипломира на Универзитетот “Селџук” ,докторира на “Гази Универзитетот”, а од 2013 година работи како лектор на “Намик Кемал” Универзитетот во Текирдаг, Турција.

Зад себе има шест самостојни изложби и голем број групни изложби. “Инскрипции, жена во простор” е најновиот циклус слики со кој авторот се представи пред охридската публика.

Изложба “Инскрипции, жена во простор” на турскиот уметник Мустафа Џеват Атал во Спомен куќата на Христо Узунов

09. 08. 2016 – 20. 08. 2016

---

Во рамките на активностите на Македонската Академија на Науките и Уметностите за одбележување на 1100-годишнината од упокојувањето на Свети Климент Охридски, на 09 август 2016 година,  во катералната црква Света Софија во Охрид беше отворена изложба на копии на фрески со ликот на светецот од црквите и манастирите во Македонија и во соседните држави. Изложбата, всушност се состоеше од фреско-копиите што на 24 мај истата година, во организација на НУ Завод и Музеј-Охрид, а по повод традиционалната манифестација “Македонија во чест на Св Кирил”, беше отворена во просториите на Понтификалниот универзитет Урбаниана во Ватикан, надополнета со уште неколку експонати, копии на фрески и фотографии. Истата оваа изложба, нешто порано, беше поставена и во просториите на МАНУ во Скопје.

Изложба “Портретите на Свети Климент Охридски во ликовната уметност во Македонија и соседните земји” во црквата Св. Софија во Охрид

29. 07. 2016

---

Марија Мешкоска е родена во Охрид (1989) година. Дипломирала во 2012 година на Факултетот за ликовни уметности, отсек сликарство со конзервација и реставрација во класата на Благоја Маневски. Магистерските студии ги продолжува на Болоњскиот Универзитет во насока конзервација и реставрација. Член е на ДЛУМ од 2012 година. Мешкоска учествувала на повеќе групни изложби, годишни изложби на ДЛУМ. Учествува во фреско живописувањето на неколку цркви во Македонија.

На изложбата се презентирани 20 слики со апстрактна тематика изработени во традиционалната сликарска техника масло на платно.

Изложба “Симфониска Имагинација” на Марија Мешкоска во куќата на Робевци

17. 06. 2016 – 30. 06. 2016

---

Во Галеријата Робевци во Охрид е отворена првата самостојна изложба на дела во комбинирана техника во голем формат на авторката Тања Џипунов.

Се работи за комбинирана техника каде акрил на платно како основа е збогатен и искомбиниран со природни материјали како коноп, дрво, хартија и слично. Еден вид слико-скулптура, нешто како инсталација на платно, вели авторката.

Богати со колорит, експонатите пленат со својата свежина и лесно комуницираат со публиката.

Изложбата е симболично насловена “Face to face” во време кога уметноста е ставена во позадина, кога сакаме да избегнеме соочување со посуштински прашања за убавото, емоциите, расудувањата и споделувањето на сопствените идеали.

Изложбата “Face to face” ќе биде поставена од 17 до 30 јуни во Куќата на Робевци во Охрид, како дел од годишната програма на НУ Завод и Музеј-Охрид која продолжува и во наредниот период.

Изложба “Face to face” на Тања Џипунов во Куќата на Робевци

03. 06. 2016 – 16. 06. 2016

---

Шафартцик е родена во1964 година во Бремен, Германија. Студирала на Универзитетот во Готинген, Германија и на Академијата за Ликовни уметности во Краков,Полска. Студирала Византиски иконопис во различни ателјеа во Русија, Франција и Австрија. Член е на Германската Федерална асоцијација на визуелни уметници како и на ГЕДОК-Германската Асоцијација на жени уметници.

Таа учествувала на меѓународни ликовни колонии во повеќе земји: во Албанија, Босна и Херцеговина, Египет, Индија, Косово, Македонија, Црна Гора и Турција. Во 2015 добива 6 неделен уметнички престој во Истамбул, Турција.

Нејзини дела се наоѓаат во јавни и приватни колекции во Германија и надвор од неа.

Изложбата содржи една селекција на слики изработени во техниката масло на платно од нејзиниот најнов циклус наречен “Тера Инкогнита”, термин што се однесува на сликарскиот фокус врз пејзажите кои не се топографски одредени. Тенденцијата на Габриеле е да отиде малку подалеку од репрезентативните одговори со цел да креира нови, помалку или повеќе апстрактни простори во личниот дијалог помегу асоцијациите, мемориите, емоциите, цитатите и симболите, боите, линиите, орнаментите и моделите.

Изложба “Непозната територија” на германската сликарка Габриеле Шафартцик во куќата на Робевци

23. 05. 2016 – 06. 06. 2016

---

Традиционалната манифестација “Македонија во чест на Св Кирил”, во 2016 година по 48 пат се одржа во Рим, Италија и беше во знакот на одбележување на двете значајни годишнини, 1130 години од доаѓањето на Св Климент Охридски во нашиот град и 1100 години од неговото упокојување. По тој повод Националната установа Завод и Музеј-Охрид реализираше пригодна изложба што беше отворена на 23 мај во просториите на универзитетот Урбаниана во Ватикан, во присуство на министерот за култура на Република Македонија, Елизабета Канческа-Милевска и претседателот на собранието на РМ, Трајко Вељаноски.

На изложбата беа презентирани 18 фреско-копии со ликот на Св Климент, сам или заедно со други светители, од црквите на територијата на Република Македонија и соседните Балкански земји. Беа изложени и пет икони од XIII до XIX век од збирката на нашата институција меѓу кои и најстарата сликана икона со претстава на св. Кимент Охридски, која, заедно со дрвената релјефна икона, е најстарата икона со претстава на заштитникот на Охрид.

Дел од изложбата беа и одреден број фотографии на цркви каде што одреден период од историјата почивале моштите на светителот, фотографии од самите мошти светителот, неговиот гроб на Плаошник, како и фотографии на современи дела-монументални споменици со неговиот лик.

Изложба “Св. Климент Охридски и неговите претстави во уметноста” во просториите на Понтификалниот универзитет Урбаниана во Ватикан