Категорија: Настани

14. 07. 2017 – 27. 07. 2017

---

Во рамките на програмата на овогодинешното издание на фестивалот Охридско лето, а како дел од летната изложбена програма на НУ Завод и Музеј-Охрид, во галеријата Робевци во Охрид беше отворена изложбата на слики на Стефан Хаџи-Николов.

Овој реномиран македонски сликар, кој во истиот простор во Охрид се претстави и пред две години со неговата 60-та самостојна изложба под наслов “Светлина од минатото”, на својата најнова изложба се претстави со најновите дела од богатиот опус.

Досега Хаџи-Николов има остварено голем број самостојни изложби, не само во Македонија туку и ширум светот, почнувајќи од 1982 па сè до денес.

Хаџи-Николов учествувал на повеќе од 100 групни изложби во земјата и надвор од неа. Учесник е на повеќе меѓународни ликовни колонии. Од 2002 до 2006 учествувал на Саемот на уметност “Импресија” во Пловдив, Бугарија.

Стефан Хаџи-Николов има добиено бројни признанија и престижни награди од областа на уметноста, со кои е потврдено неговото творештво.

Изложбата на слики на Стефан Хаџи-Николов во галеријата Робевци во Охрид.

13. 07. 2017

---

Денес во прва официјална посета на НУ Завод и Музеј-Охрид престојуваше министерот за култура на Република Македонија г-дин Роберт Алаѓозовски, придружуван од шефот на неговиот кабинет Тодорче Тасевски и советникот Петрит Сарачини.

Тие имаа куса работна средба со директорката Тања Паскали-Бунташеска, која помина во пријатна атмосфера и на која му беа претставени тековните проекти на нашата институција, но и севкупното работење во изминатиот период, како и одредени проблеми со кои се соочуваме во секојдневното работење.

По средбата, министерот со својата придружба направи обиколка на работните простории и депоата во управната зграда “Радничка”, при што се запозна со вработените и имаше прилика непосредно да се запознае со повеќе сегменти од севкупното работење на НУ Завод и Музеј-Охрид, посебно од областа на заштитата и музеологијата, како основни дејности на нашата институција.

На крајот од престојот, министерот со своите соработници, придружуван од директорката Тања Паскали-Бунташеска, ја посети Галеријата на икони и црквата Св. Богородица Перивлепта при што изрази задоволство од начинот на чување, обезбедување и експонирање на вредните икони и севкупната состојба во Галеријата, како и од состојбата на црквата по сеопфатната конзервација (архитектурата и фреско-живописот), извршена во изминатите две години.

Посета на министерот за култура на РМ, г-дин Роберт Алаѓозовски на НУ Завод за заштита на спомениците на културата и Музеј-Охрид

07. 07. 2017

---

Синоќа во куќата на Уранија се одржа промоција на научното дело “Монетарна циркулација на Плаошник-Охрид во римскиот империјален период” од охриѓанката Сања Битрак, археолог и нумизматичар, вработена во Археолошкиот музеј во Скопје.

Во античко време древниот Лихнид бил значаен економски центар и ковал свои монети наречени лихнидиони, а свои монети имало и племето Десарети кои го населувале овој простор.

За време на истражувањата на Плаошник пронајдени беа над 20.000 монети коишто не само што го збогатија нумизматичкиот фонд на градот, туку и дадоа некои податоци за економската и историската активност на овој град и регионот.

Книгата содржи 287 примероци на монети пронајдени на овој локалитет во периодот од 2001 до 2010 година. Монетите се ковани од сребро и бронза и истите се многу значајни како културно наследство.

Промоторот на книгата, д-р Славица Бабамова истакна дека таа содржи многу значајни податоци, досега непознати за научната јавност и дека пополнува еден значен сегмент од историјата на Македонија во римскиот период, историска епоха за која случувањата во Македонија се сосема кратко споменувани во античките извори.

Книгата “Монетарна циркулација на Плаошник-Охрид во римскиот империјален период” е прво дело на Сања Битрак, а промоцијата беше во организација на НУ Завод и Музеј Охрид.

Промоција на книгата “Монетарна циркулација на Плаошник-Охрид во римскиот империјален период” на археологот и нумизматичар Сања Битрак

25. 06. 2017 – 30. 06. 2017

---

Кон крајот на месец јуни 2017 година, во долниот простор на Галеријата на икони-Охрид беше изложен уште еден дел од богатото наследство од збирките на НУ Завод и Музеј-Охрид.

Се работи за дваесетина фреско-копии со ликовите на словенските просветители Сс. Климент и св. Наум Охридски, но и Сс. Кирил и Методиј и други светители од црквите во Македонија и соседните земји, но и една од Рим, Италија. Копиите се изработени претежно во 1966 и 1980 година, по повод прославата на 1050 годишнината од упокојувањето на св. Климент Охридски (1966) и отворањето на Музејот на Словенската писменост во Охрид (1980) од страна на најпознатите кописти во тоа време како Драгомир Јашовиќ, Зденка Живковиќ, Никола Цонев и други. Минатата, 2016 година, поголемиот дел од овие фреско-копии беа изложени на изложбата “Св. Климент Охридски и неговите претстави во ликовната уметност” во универзитетот Урбаниана во Ватикан, како и на две други изложби во Скопје и Охрид.

Во склопот на оваа изложба се изложени и одреден број црковни везови и литургиски предмети од збирката, сè со цел да се збогати содржината и разноликоста на предметите што им се презентираат на посетителите на Галеријата на икони-Охрид.

Изложба на фреско-копии, црковни везови и литургиски предмети

25. 06. 2017 – 02. 07. 2017

---

Синоќа во Центарот за култура “Григор Прличев” во Охрид беше отворена петтата сесија на меѓународната Летна школа за архитектура во организација на Факултетот за архитектура и дизајн при Универзитетот “Американ колеџ” од Скопје и НУ Завод за заштита на спомениците на културата и Музеј-Охрид.

На отворањето се обратија деканот, проф. д-р Мишко Ралев, како и раководителот на школата Владимир Десков, а потоа свое предавање имаше словенечкиот архитект Деан Лах. 

По чинот на отворањето и предавањето на Деан Лах, учесниците на Летната школа заедно со организаторите, домаќините и гостите имаа прилика за неконвенционални разговори и дружба на мал пригоден коктел, организиран на просторот на Лапидариумот, до куќата на Робевци.

Летната школа, чија овогодинешна тема е “Природни системи”. ќе биде под раководство на архитектот Деан Лах, коосновач и партнер во реномираното архитектонско студио “Енота” од Љубљана и ќе трае до 2 јули. Гости на школата ќе бидат и архитектите Крешимир Рогина и Винко Пенезиќ од Хрватска, како и Јуриј Личен од Словенија. На школата учествуваат студенти по архитектура од универзитетите “Американ колеџ” и “Св. Кирил и Методиј”. Во рамките на школата ќе бидат одржани и предавања од страна на гостите предавачи, а во сабота 01. 07. 2017 ќе се одржи и јавна презентација на студентските проекти.

Отворање на петтата меѓународна Летна школа за архитектура

16. 06. 2017 – 29. 06. 2017

---

Изложбата “Intaglio” се состои од графички дела од авторите на графичкото студио “Print Nest+” од Софија, Бугарија. Имено, шест млади автори од Македонија и од Бугарија имаат воспоставено свое студио во Софија, Бугарија автори кои ги поттикнуваат и негуваат традиционалните графички техники.

“Print Nest Studio” е работилница во која група на млади уметници вљубeни во графичката уметност, пронашла начин како имагинрниот свет да го претвори во реален. Студиото е комбинација на различни личности, луѓе со различни способности и ставови кон животот, но со заедничка точка на исчезнување. Основно обележје на графиката на овие млади автори е да се изгради имиџ во опсегот помеѓу црната и белата боја. Тие главно ги користат традиционалните графички техники за да создадат форми и простори, услови, мисли и чувства и да ѝ дадат посебна топлина и блискост на перцепцијата. Современиот изглед на графичките листови е засилен со актуелноста на прашањата кои ги третираат во своите дела. Тематските регистри се разновидни и повеќеслојни. Обрасците технички се разликуваат, од прецизноста на минијатурата до монументалност. На оваа изложба, која ќе трае до 29 јуни своите дела ќе се прикаже на уметници: Зоран Мише, Иван Матеев, Васил Ангелов, Горан Тричковски, Павел Целкоски и Ива Димитрова.

Во петок, на 16 јуни 2017 година, во 20:00 часот, во Уметничката Галерија Робевци ќе биде отворена изложбата “Intaglio” на Print Nest + студиото од Софија, Бугарија

30. 06. 2017 – 06. 07. 2017

---

Ликовните дела на романската сликарка Емилиа Персу, по пауза од шест години повторно се изложени во Охрид. На 30. 06. 2017 година, во Галеријата Робевци беше отворена изложбата под наслов “Внатрешна градина” на оваа сликарка што е дел од авангардната генерација на уметници од Романија. На изложбата беше преставен најновиот циклус дела на авторот, изработени на платно во комбинирана техника.

Инаку Емилиа Персу е ликовен уметник и претседател на графичкиот отсек во Друштвото на ликовни уметници на Романија.

Родена е на 21 февруари 1963 година во Букурешт, Романија, а дипломирала на Факултетот за Ликовни Уметности, отсек сликарство, исто така во Букурешт.

За прв пат пред охридската публика нејзините ликовни дела беа презентирани во 2011 година, на изложбата насловена како “Постмодерен Левант”. Нејзините дела љубителите на ликовната уметност имале можност да ги видат и во голем број европски земји, а учествувала и на голем број, кампови, фестивали и симпозиуми во Ирак, Индија, Мароко и Санкт Петерзбург во Русија.

Изложба “Внатрешна градина” на романската сликарка Емилиа Персу

19. 05. 2017

---

Традиционално, како и во изминатите години, НУ Завод и Музеј-Охрид го одбележува 18 мај Меѓународниот ден на музеите. Оваа година тој се одбележува со 27-та изложба на уметнички дела од нашиот богат фонд на современата уметност. Како и во претходните години, на изложбата се изложени делата на уметниците кои имаа свои изложби во последните неколку години во Уметничката галерија Робевци.

27 традиционална изложба по повод на 18-ти мај, Меѓународниот ден на музеите во куќата на Робевци

 09. 04. 2017 – 14. 04. 2017

---

Од 9 до14 Април 2017 година во нашата земја престојува реактивна мониторинг мисија на УНЕСКО/ИКОМОС/ИУЦН за да изврши увид во спроведените активности на терен и да оцени колку се почитуваат нивните препораки за обемот на градежните зафати и нивното влијание врз животната средина и културното наследство на светското добро “Природното и културното наследство на Охридскиот регион”.

Мисијата во состав: г-ѓа Ана Сидоренко, претставник од Центарот за светско наследство на УНЕСКО, г-ѓа Маја Васиљевиќ од ИУЦН (Меѓународна унија за конзервација на природата, советодавно тело на УНЕСКО) и г-дин Пјер-Мари Трико, претставник од ИКОМОС (Меѓународен совет за споменици и места, советодавно тело на УНЕСКО), денес имаше работна средба во НУ Завод за заштита на спомениците на културата и Музеј-Охрид. Според г-ѓа Сидоренко средбата беше со цел да се добијат информации и да се видат напорите, проектите и напредокот во нивната имплементација од страна на централната, но и локалната власт, во заштитата на културното наследство и спроведувањето на забелешките од УНЕСКО од минатата година на 40-тата седница одржана во Истанбул. По извршениот мониторинг од страна на мисијата, како и по состаноците и консултациите што следуваат, ќе бидат презентирани нивните натамошни насоки и препораки.

По работниот состанок, експертите од УНЕСКО ги посетија локалитетот Плаошник, црквите “Св. Богодорица Перивлепта” и “Св. Софија”, Галеријата на икони, Античкиот театар, локалитетот “Манчевци” и повеќе објекти на кои се преземени конзерваторски активности.

Од 9 до14 Април 2017 година во нашата земја престојува реактивна мониторинг мисија на УНЕСКО/ИКОМОС/ИУЦН

04. 04. 2017 – 05. 04. 2017

---

Форумот на Словенските Култури (ФСК) е непрофитна организација основана во 2004 Година во Љубљана. На иницијатива на експертскиот тим на земјите членки на Форумот (Белорусија, Бугарија, Босна и Херцеговина, Црна Гора, Чешка Република, Хрватска, Македонија, Полска, Русија, Словенија, Словачка и Србија) во 2012 година е востановена наградата “Жива”, а натпреварувањето е во шест категории.

Со своето учество, земјите членки на ФСК ги промовираат исклучителните достигнувања на полето на културните вредности истакнувајќи го при тоа значајното културно наследство на словенските земји. Самата награда е наречена “Жива”, според словенската божица на плодноста, чиј главен атрибут е житото, па и изгледот на оваа посебна награда е инспириран токму од класовите жито.

Оваа година доделувањето на наградите ќе се одржи на Блед во Словенији, од 20 до 24 септември, а нашата институција е единствен номиниран кандидат од нашата земја помеѓу повеќе од 20 музеи од 13 земји.

Деновиве (4-5 април), во Охрид престојуваа судиите Билјана Брајовиќ од Црна Гора и Катја Џумалиева од Бугарија за да извршат увид и оцена на капацитетите, вредностите, значењето, богатството и разновидноста на нашите музејски збирки и воопшто севкупното работење на НУ Завод и Музеј-Охрид на полето на чувањето, документацијата, заштитата и конзервацијата и, секако, презентацијата на огромниот фонд културно наследство што ни е доверено на чување за идните поколенија. Фотографиите се од денешната посета на Музејот на вода во Заливот на коските, единствен од овој вид на Балканот и воопшто во поширокиот регион. Според реакциите и нескриеното воодушевување на судиите навистина сме сериозен кандидат за добивање на некоја од наградите, држете ни палци.

Престој на судиите Билјана Брајовиќ од Црна Гора и Катја Џумалиева од Бугарија